Aktualiséiert den
Droit-d’auteuren an Droit-voisinen
Droit-d'auteuren
D'Droit-d'auteure schützen Originalwierker a ginn hirem Createur gesetzlech Virrechter. Dat heescht, dass all Wierk, dat materialiséiert ass a bei deem et sech ëm en Originalwierk handelt, wéi zum Beispill Biller, Tabloen, Fotoen, Zeechnungen, Literatur, Filmer, Liddtexter, Partituren, Elementer vun Internetsitten, Schoulbicher, Softwareprogrammer, architektonesch Gebaier oder all aner Zort Originalwierk, duerch den Droit d'auteur geschützt ka ginn.
Iddien, Aarbechtsmethoden, Konzepter oder Informatiounen als solch ginn duerch d'Droit-d'auteuren net geschützt.
De Schutz duerch den Droit d'auteur bedeit, dass all Reproduktioun, Distributioun oder Kommunikatioun vun engem Wierk un de Public zwangsleefeg muss schrëftlech vum Auteur oder vum Titulaire vu Rechter autoriséiert ginn. Wann et méi Auteuren oder Titulairë vu Rechter ginn, muss een am Virfeld eng schrëftlech Autorisatioun vun allen Auteuren oder Titulairë vu Rechter kréien.
De Schutz duerch Droit-d’auteuren oder Droit-voisinen erfuerdert keng formell Androungsprozedur. D'Droit-d'auteuren entstinn nämlech eleng duerch d'Schafe vum Wierk. D'Createure kréien heiduerch automatesch Rechter op hire Wierker, duerch déi se hir spéider Notzung duerch Drëtter kontrolléiere kënnen.
De Schutz besteet wärend dem ganze Liewe vum Auteur an nach 70 Joer no sengem Doud zu Gonschte vu sengen Ierwen oder den Titulairë vu Rechter.
Droit-voisinen
D'Droit-voisine sinn, am Hibléck op d'Rechter, déi sech aus hinnen erginn, änlech wéi d'Droit-d'auteuren. Hiert Zil ass de Schutz vun der kënschtlerescher oder finanzieller Contributioun, déi an déi literaresch oder kënschtleresch Kreatioun gefloss ass. Zu Lëtzebuerg ginn Droit-voisinen Tounträgerproduzenten, Filmproduzenten, ausübende Kënschtler, Radiodiffusiounsorganisatiounen a Presseverläg op hiren Online-Publikatiounen accordéiert.
De Schutz duerch d'Droit-voisinen bedeit, dass all Opzeechnung, Reproduktioun oder Kommunikatioun vun engem Wierk un de Public zwangsleefeg am Virfeld eng Autorisatioun vum Titulaire vu Rechter erfuerdert.
Den Titulairë vun Droit-voisinen gëtt en exklusiivt Recht zouerkannt, fir d'Opzeechnung, d'Kommunikatioun un de Public an déi direkt oder indirekt Reproduktioun vu senge Prestatiounen ze autoriséieren. All Notzung vun enger Prestatioun, déi duerch en Droit-voisin geschützt ass, erfuerdert deemno, dass ee virdrun eng Autorisatioun vum Titulaire vun de Rechter kritt. Wann et méi Titulairë vu Rechter ginn, muss ee virdrun eng Autorisatioun vun all dësen Titulairë kréien.
Wéi bei den Droit-d'auteuren ass och fir de Schutz duerch Droit-voisinen keng formell Androungssprozedur erfuerdert. D'Droit-voisinen entstinn automatesch duerch d'Opféierung, d'Opzeechnung oder d'Produktioun vun der Prestatioun.
D'Dauer vum Schutz duerch Droit-voisinen variéiert jee nom Recht, dat geltend gemaach gëtt.
Ausnamen zu den Droit-d’auteuren an Droit-voisinen
A bestëmmte Fäll dispenséiert d'Gesetz d'Notzer dovun, bei den Titulairë vu Rechter eng Autorisatioun unzefroen, fir geschützte Wierker ze reproduzéieren oder dem Public ze kommunizéieren.
Bei den Ausnamen an Aschränkunge geet et deemno ëm Situatiounen, an deenen et erlaabt ass, e Wierk ze reproduzéieren an/oder dem Public ze kommunizéieren, ouni virdru beim Auteur oder den Titulairë vun dësem Wierk eng Autorisatioun unzefroen.
Dës Ausnamen an Aschränkunge ginn am Kader vun enger limitativer Opzielung an der nationaler Legislatioun genannt. All Ausnam zu oder Aschränkung vun Droit-d’auteuren an Droit-voisinen gëllt ëmmer nëmmen ënner bestëmmte Bedéngungen. Wann een d'Uwendung vun enger Ausnam zu oder enger Aschränkung vun Droit-d’auteuren an Droit-voisinen wëll geltend maachen, muss ee préiwen, ob dës Bedéngungen och tatsächlech erfëllt sinn. Wann eng vun dëse Bedéngungen net erfëllt ass, bedeit d'Notzung vum Wierk, ouni virdrun eng Autorisatioun kritt ze hunn, effektiv eng Verletzung vun den Droit-d’auteuren oder Droit-voisinen.
Sécherheet beim Beweise vum Datum
De Beweis fir den Datum vun der Kreatioun kann op all Aart a Weis erbruecht ginn.
A bestëmmte Fäll kann et nëtzlech sinn, verschidde Formalitéiten ze erleedegen, duerch déi d'Createuren den Datum vun der Kreatioun vum Wierk oder vun all Aart vu Contenu beweise kënnen.
De Benelux-Office fir geeschtegt Eegentum (Office Benelux de la Propriété Intellectuelle - BOIP) proposéiert zu dësem Zweck déi sougenannt i-DEPOT-Léisung. Mat engem i-DEPOT kann ee beweisen, dass e Wierk oder e Contenu zu engem bestëmmten Datum existéiert huet. Bei engem i-DEPOT handelt et sech ëm e Beweis vum BOIP, dass e Wierk, en Dokument oder iergendeng aner Aart vu Contenu um Datum vum entspriechenden Depôt existéiert huet. D'Dokumenter gi vum Office wärend enger Dauer vu 5 oder 10 Joer gehalen, jee nodeem, fir wat fir en Zäitraum den Demandeur sech entscheet huet (d'Opbewarungsdauer kann ëm fënnef zousätzlech Joer verlängert ginn).
Organisatiounen, déi zu Lëtzebuerg fir d'Erdeele vu Lizenzen zoustänneg sinn
Zu Lëtzebuerg gëtt et Organisatiounen, déi d'Droit-d'auteure kollektiv verwalten an am Numm vun den Auteuren an den Titulairë vu Rechter géint Bezuelung Lizenzen erdeelen:
- d'Gesellschaft vun den Auteuren, Komponisten a Museksediteuren (SACEM Luxembourg, Société des auteurs, compositeurs et éditeurs musicaux) verwalt Rechter un Tounwierker;
- d'Lëtzebuerger Organisatioun fir Reproduktiounsrechter (Luxorr, Luxembourg Organization for Reproduction Rights) verwalt d'Rechter vun den Auteuren an Editeure vu literareschen a gläichgestallte Wierker;
- d'Lëtzebuerger Associatioun fir d'Gestioun vun audiovisuelle Wierker (Algoa, Association luxembourgeoise de gestion des œuvres audiovisuelles) verwalt Rechter un audiovisuelle Wierker;
- d'Associatioun fir d'kollektiv Gestioun vun audiovisuelle Wierker an Europa (AGICOA EUROPE, Association pour la gestion collective des œuvres audiovisuelles en Europe) verwalt Rechter un audiovisuelle Wierker;
- d'Gesellschaft vun de Bünenauteuren a -komponisten (SACEM-SACD, Société des auteurs et compositeurs dramatiques) verwalt Rechter u Bünewierker (Live-Manifestatiounen).