Talenter

Unzéien, Bannen an Entwécklung vun Talenter

Den aktuelle Mangel un Aarbechtskräften an déi zukünfteg Besoine vum Aarbechtsmaart (Ersetze vu besteeënden Aarbechtsplazen an nei Aarbechtsplazen) sinn en Defi souwuel fir d'Dynamik vun der Wirtschaft ewéi och fir d'Stabilitéit vum nationale Sozialmodell.

Et geet drëm, d'wirtschaftlech Integratioun vun de Populatiounen aus der Grenzregioun an de Residenten zu Lëtzebuerg laangfristeg ofzesécheren, mee och d'Echangë mat den europäeschen an den Net-EU-Populatiounen ze stäerken, a gläichzäiteg d'Diversifizéierung, d'Attraktivitéit an d'Kompetitivitéit vun der nationaler Ekonomie ze stimuléieren.

Et gouf sech fir eng large Definitioun vum Wuert "Talent" entscheet, déi all Aart vu Beruff a all Qualifikatiounsniveau ëmfaasst, fir déi an der Lëtzebuerger Ekonomie Besoine geäussert ginn. 

Aus dësem Grond gouf am Juni 2023 en interministerielle Comité fir d'Unzéien, d'Bannen an d'Entwécklung vun Talenter geschaf, wou déi betraffe ministeriell Departementer, Verwaltungen an Institutioune vertruede sinn. Dëse Comité definéiert déi strateegesch Orientatiounen a suergt fir e koordinéierte Suivi vun de Regierungsmoossnamen.

Den Héije Comité fir d'Unzéien, d'Bannen an d'Entwécklung vun Talenter (Haut Comité pour l’attraction, la rétention et le développement de talents), deen am Koalitiounsaccord 2023-2028, virgesinn ass, gouf am Mee 2024 vum Regierungsrot an d'Liewe geruff. Et handelt sech heibäi ëm e Berodungsorgan mat der Aufgab, Avisen ofzeginn a Propositiounen ze formuléieren, fir d'Regierung bei hire Moossnamen am Zesummenhang mat der Talentthematik ze guidéieren.

Den Héije Comité setzt sech aus follgende Memberen zesummen: de Ministeren, déi fir d'Beräicher Aarbecht, auswäerteg Ugeleeënheeten, Héichschoul, Finanzen, Beruffsausbildung an Immigratioun zoustänneg sinn, esouwéi der Handelskummer (Chambre de Commerce), der Handwierkschamber (Chambre des Métiers) an der Salariéschamber (Chambre des Salariés). Den Héije Comité gëtt vum Minister fir Wirtschaft an enker Ofstëmmung mam Aarbechtsminister presidéiert.

De Wirtschaftsministère stellt d'Koordinatioun vun der Aarbecht vum interministerielle Comité a vum Héije Comité iwwer en Exekutivsekretariat sécher.

D'Regierungsmoossnamen fir d'Unzéien, d'Bannen an d'Entwécklung vun Talenter orientéieren sech u 6 strateegeschen Achsen:

• D'Verfügbarkeet vun den Donnéeën a Statistike verbesseren, fir besser Decisiounen ze huelen a eng besser Ausriichtung vun de getraffene Moossnamen ze erreechen
• Lëtzebuerg als "Talent Hub" promovéieren
• Den Accueil vun internationalen Talenter vereinfachen
• Den Zougang vun de Frontalieren zum Aarbechtsmaart erliichteren
• D'Zesummeliewe fir déi Leit, déi nei bei eis kommen, verbesseren an d'Banne vun Talenter fërderen
• D'Entwécklung vun Talenter fërderen

'Work in Luxembourg': eng national an eenheetlech Mark

Fir Lëtzebuerg op internationalem Niveau als attraktiv Aarbechtsplaz ze promoten, hunn d'Membere vum Haut Comité fir d'Attraktioun, d'Retentioun an d'Entwécklung vun Talenter decidéiert, hir Aktiounen ënner enger eenzeger Mark ze konsolidéieren: 'Work in Luxembourg'.

Ënner dem Slogan „Your future starts here“ huet dës Mark d'Zil, Lëtzebuerg als internationale Pol fir Talenter ze positionéieren, déi sech hei nidderloossen, schaffen an en nohaltegt Liewen opbaue wëllen. Si ënnersträicht d'Stäerkte vum Land: Sécherheet, Multikulturalitéit, eng dynamesch Wirtschaft, Karriärsméiglechkeeten, international Bildung an eng héich Liewensqualitéit. D'Mark suergt fir eng konsequent a koordinéiert Kommunikatioun, souwuel mat den Talenter wéi och mat de Betriber.

Zousätzlech ginn et och Pläng, ënner dem Banner 'Work in Luxembourg' un internationalen Evenementer deelzehuelen, besonnesch an Zesummenaarbecht mat de wirtschaftleche Promotiounsinitiativen, déi vum 'Trade & Invest'-Netzwierk organiséiert ginn.

Portal 'Work in Luxembourg'

Entwéckelt vu Luxinnovation op Ufro vum Wirtschaftsministère, ass de Portal 'www.workinluxembourg.com' haaptsächlech als eenzeg Ulafstell, fir international Talenter a fir Entreprisen, déi no Talenter sichen.

De Portal ass an dräi Deeler opgedeelt:

• „Work here“ : Hei schaffen, mat engem Fokus op d'Aarbechtsbedéngungen, Karriären an d'Secteure vun der Wirtschaft;

• „Live here“ : Hei liewen, iwwert d‘Liewen zu Lëtzebuerg, der Famill, der Bildung, der Gesondheet an der Fräizäit;

• „Get started“ : Ufänken mat prakteschen Informatiounen iwwer Immigratioun, der neier Aarbecht an d'Sich no enger neier Wunneng zesummefaasst.

E Relocation-Guide steet internationalen Talenter zur Verfügung, wärend lëtzebuergesch Entreprisen op en Employer Toolkit zougräife kënnen, dee praktesch Informatiounen enthält, fir si bei hiren internationale Rekrutementsdemarchen ze ënnerstëtzen.

De Portal ass direkt mat der internationaler Rekrutementsplattform vun der ADEM verbonnen, déi Stellen an de Secteure mat groussem Aarbechtskraaftmanktem ervirhieft. Hei kënnen Talenter, déi en Online-Profil uleeën a sech op Plaze mellen, déi bei hire Profil passen.

En Chatbot, deen an de Site integréiert ass, beäntwert och d'Froe vun de Benotzer a gëtt stänneg duerch Zesummenaarbecht mat aneren ëffentleche Plattformen, virun allem www.Guichet.lu, weider verbessert. De Portal deen aktuell op Englesch disponibel ass, gëtt an enger zweeter Phas op aner Sproochen iwwersat, an de Contenu gëtt reegelméisseg op Basis vum Feedback vun de Benotzer an de Bedierfnesser, déi am Feld identifizéiert goufen, erweidert.

Den Talent Desk: Ënnerstëtzung sur mesure

Als Ergänzung zum Portal an zum Chatbot huet de physeschen Talent Desk, am House of Entrepreneurship, d'Zil, Persounen ze informéieren, ze guidéieren an ze ënnerstëtzen, wéi si sech zu Lëtzebuerg nidderloossen an integréieren, a se bei Bedarf un déi relevant Institutioune weider ze leeden. Den Talent Desk soll Betriber ënnerstëtzen, datt si sech op hir international Rekrutementdemarche konzentréiere kënnen, an op Tools a Servicer zeréckgräifen, fir Lëtzebuerg als professionell Destinatioun ze promoten.

Den Talent Desk gëtt vun der Chambre de Commerce an enker Zesummenaarbecht mam Wirtschaftsministère an der Chambre des Métiers geréiert a schafft mat ville institutionelle Partneren, dorënner d’Chambre des Salariés.

Ënnert den éischte Projeten ass de Start, an Zesummenaarbecht mam Ministère fir Famill, Solidaritéit, Zesummeliewen an Accueil an dem House of Training, vun engem Spouse Program, fir d'berufflech a sozial Integratioun vun de Liewenspartner vun Talenter ze erliichteren an domat hiert laangfristegt Liewen a Lëtzebuerg ze fërderen.